"myUNEC" istifadəyə verildi

Azərbaycan Dövlət İqtisad Universitetində tələbələrə göstərilən elektron xidmətlərin əhatəsini genişləndirən və tədris idarəçiliyini rəqəmsallaşdıran "myUNEC" mobil tətbiqi ictimaiyyətə təqdim olunub. Sentyabrın 11-də istifadəçilərin ixtiyarına verilən platforma qısa zamanda böyük maraq toplayaraq ölkə üzrə ən çox yüklənən mobil tətbiqlər reytinqində ilk pilləyə yüksəlib. Artıq 5 minə yaxın tələbə tətbiqdən fəal şəkildə yararlanır.

"Rəqəmsal UNEC" strategiyasının davamı olan bu layihə universitet daxilində şəffaflığın artırılması, operativliyin yüksəldilməsi və xidmətlərin tələbələr üçün daha əlçatan edilməsi məqsədini daşıyır. Yenilik sayəsində təhsilalanlar dərs cədvəli, gündəlik davamiyyət və imtahan balları ilə anında tanış ola, mühazirə və tədris resurslarını birbaşa tətbiq vasitəsilə izləyə bilərlər. Eyni zamanda tələbələr daxili sorğularda və tələbə təşkilatlarının seçkilərində onlayn səsvermə hüququndan istifadə edəcək, universitet elanlarını birbaşa bildiriş (push notification) şəklində əldə edəcəklər.

Platforma valideyn nəzarəti mexanizmini də dəstəkləyir. Tələbənin təqdim etdiyi giriş məlumatları vasitəsilə valideynlər də öz cihazlarından övladlarının akademik göstəricilərini mütəmadi izləmək imkanı qazanırlar.

Müasir texnoloji imkanlarla təchiz edilmiş "myUNEC" sürətli axtarış funksiyası, tədris cədvəlinin ekran vidceti kimi əlavə olunması, oflayn rejimdə çalışma və biometrik təhlükəsizlik (Face ID / PIN) alətləri ilə seçilir. Tələbə-universitet əlaqələrini vahid rəqəmsal platformada birləşdirən proqramı "App Store" və "Google Play" üzərindən yükləmək mümkündür.