Pedaqoji Şuranın birinci iclasında fəaliyyət planlarının, məktəbdaxili nəzarətin, metodiki işin və şagird dəstəyinin təşkili - II hissə Situasiyalı testlər

On birinci məsələ — məktəbin illik fəaliyyət planının və digər fəaliyyət planlarının təsdiqi. On birinci məsələ məktəbin 2026–2027-ci tədris ili üzrə illik fəaliyyət planının və onunla əlaqəli digər planların müzakirəsinə həsr olunmalıdır. Məktəbin illik fəaliyyət planı əvvəlki tədris ilinin nəticələrinə, müəyyənləşdirilmiş problemlərə, real imkanlara və ölçülə bilən hədəflərə əsaslanmalıdır. Pedaqoji Şuranın illik fəaliyyət planı ilk iclasda müzakirə olunmalı və məktəbin illik fəaliyyət planının tərkibində təsdiq edilməlidir. Tədris və metodiki iş, tərbiyə işi, sinifdənxaric və məktəbdənkənar iş, kitabxana fəaliyyəti, psixoloji iş, təsərrüfat və təhlükəsizlik, valideynlərlə iş və məzunlarla iş planları məktəbin ümumi hədəfləri ilə əlaqələndirilməlidir. Bu planlar bir-birindən təcrid olunmuş sənədlər kimi deyil, məktəbin illik fəaliyyət planının tərkib hissələri və ya əlavələri kimi təqdim edilməlidir. Hər tədbir üzrə problem, məqsəd, məzmun, icra müddəti, məsul şəxs, əməkdaşlar, icra indikatoru, nəticə indikatoru və məlumat mənbəyi göstərilməlidir. Eyni tədbirin müxtəlif planlarda təkrar verilməsi, məktəbin ehtiyacına əsaslanmayan formal fəaliyyətlər və ölçülməsi mümkün olmayan nəticələr aradan qaldırılmalıdır. Məruzəçi planların hazırlanma əsaslarını, qarşılıqlı əlaqəsini, prioritet tədbirləri və gözlənilən nəticələri Şura üzvlərinə təqdim etməlidir. Qərarda məktəbin illik fəaliyyət planının və onun tərkibində razılaşdırılmış sahə planlarının təsdiqi, məsul şəxslər, hesabat dövrləri və nəzarət qaydası göstərilməlidir.