Qarabağ Universiteti və “Veysəloğlu” şirkəti arasında müqavilə imzalanıb

Veysəloğlu Şirkətlər Qrupu Qarabağda təhsilin inkişafına və Qarabağ Universitetinin təhsil potensialının gücləndirilməsinə dəstək məqsədilə yeni tərəfdaşlığa başlayıb.

Direktor.az xəbər verir ki, bu barədə Qarabağ Universitetindən bildirilib. Təhsilin İnkişafı Fondu, Qarabağ Dirçəliş Fondu və Veysəloğlu Şirkətlər Qrupu arasında müzakirə görüşü keçirilib.

Görüşdə TİF-in İdarə Heyətinin sədri Nicat Məmmədli, QDF-in İdarə Heyətinin sədri Rəhman Hacıyev, Qarabağ Universitetinin rektoru Şahin Bayramov, Veysəloğlu Şirkətlər Qrupunun təsisçisi və baş icraçı direktoru Aydın Veysəloğlu iştirak edib.

Müzakirələr zamanı işğaldan azad edilmiş ərazilərdə müasir təhsil infrastrukturunun inkişafı, Qarabağ Universitetinin strateji inkişafına dəstək, tələbələrin peşəkar inkişaf imkanlarının genişləndirilməsi məsələləri müzakirə edilib.

Qarabağ Universitetində təhsil alan tələbələr üçün xüsusi təqaüd proqramlarının yaradılması, təcrübə imkanlarının genişləndirilməsi haqqında fikir mübadiləsi aparılıb.

TİF-in İdarə Heyətinin sədri Nicat Məmmədli Qarabağın dayanıqlı inkişafında təhsilin mühüm rolunu vurğulayıb.

QDF-in İdarə Heyətinin sədri Rəhman Hacıyev azad edilmiş ərazilərdə dayanıqlı məskunlaşmanın təmin olunmasında təhsilin xüsusi əhəmiyyət daşıdığını diqqətə çatdırıb. O, regionda insan kapitalının formalaşması və gənclərin təhsil imkanlarının genişləndirilməsinin Qarabağın hərtərəfli bərpası baxımından mühüm əhəmiyyət kəsb etdiyini bildirib.

Qarabağ Universitetinin rektoru Şahin Bayramov qeyd edib ki, həyata keçirilən əməkdaşlıqlar universitetin akademik imkanlarının genişləndirilməsi, tələbələrin peşəkar inkişafının dəstəklənməsi və onların əmək bazarına hazırlığının gücləndirilməsi baxımından əhəmiyyətlidir.

Veysəloğlu Şirkətlər Qrupunun təsisçisi və baş icraçı direktoru Aydın Veysəloğlu isə təhsilə dəstəyin şirkətlər qrupunun strateji prioritetlərindən biri olduğunu bildirib. O, keyfiyyətli təhsilin inkişafının insan kapitalının gücləndirilməsi və peşəkar kadr potensialının formalaşdırılması baxımından mühüm rol oynadığını qeyd edib.

Görüşün sonunda Qarabağ Universitetinə dəstək məqsədilə Təhsilin İnkişafı Fondu ilə Veysəloğlu Şirkətlər Qrupu arasında tərəfdaşlıq müqaviləsi imzalanıb.

Müqavilə çərçivəsində göstəriləcək dəstəyin Qarabağ Universitetinin inkişafına, tələbələr üçün yeni imkanların yaradılmasına və universitetin təhsil potensialının gücləndirilməsinə töhfə verməsi nəzərdə tutulur.

Qeyd edək ki, 2 iyun 2025-ci il tarixində Xankəndi şəhərində keçirilən “Qarabağ Təhsil və Tərəfdaşlıq Forumu” çərçivəsində Qarabağ Dirçəliş Fondu ilə Təhsilin İnkişafı Fondu arasında Anlaşma Memorandumu imzalanıb. Razılaşmaya əsasən, “Qarabağ Təqaüd Proqramı” çərçivəsində 2025–2026-cı akademik ili üzrə Qarabağ Universitetində təhsil alan 50 tələbəyə təqaüd dəstəyi göstərilir.