ADU-nun Konfutsi İnstitutu “Milli Geyim Günü” festivalında iştirak edib

ADU-nun Konfutsi İnstitutu yeni tədris ilini silsilə mədəni və elmi tədbirlərlə qarşılayıb.

Direktor.az xəbər verir ki, yeni tədris ilinin start götürməsi münasibətilə Azərbaycan Dillər Universitetinin (ADU) nəzdində fəaliyyət göstərən Konfutsi İnstitutu tərəfindən Çin mədəniyyətini, dilini və təhsil ənənələrini təbliğ edən silsilə proqramlar təşkil olunub.

İnstitutun müəllim və tələbə heyəti İçərişəhərin tarixi atmosferində keçirilən “Milli Geyim Günü” festivalında fəal iştirak edib. Çinin Azərbaycandakı səfiri Lu Meyin də fəxri qonaq qismində qatıldığı tədbirdə Şərq zərifliyinin rəmzi sayılan ənənəvi qipao geyimləri sərgilənib. Qonaqlara bu libasların müasir biçiminin əsasının məhz 1920-ci illərdə Şanxay modelyerləri tərəfindən qoyulduğu barədə ətraflı məlumat verilib. Bununla yanaşı, iştirakçılara Çinin zəngin irsini əks etdirən milli rəqslər, qədim xəttatlıq nümunələri və klassik çay dəsgahı mərasimi təqdim edilib.

Mədəni tədbirlərlə paralel olaraq akademik əlaqələrin möhkəmləndirilməsi istiqamətində də mühüm addım atılıb. Konfutsi İnstitutunun həmsədrləri Rafiq Abbasov və Li Jihua Çin Sosial Elmlər Akademiyasının tədqiqatçı qrupu ilə görüş keçiriblər. Şanxay Əməkdaşlıq Təşkilatı Tədqiqat Mərkəzinin baş katibinin müavini Yang Jinin rəhbərlik etdiyi nümayəndə heyəti ilə ölkəmizdə Çin dilinin mənimsənilməsi metodikası və "Bir kəmər, bir yol" qlobal layihəsi çərçivəsində mədəni əlaqələrin dərinləşdirilməsi perspektivləri ətrafında fikir mübadiləsi aparılıb.

Görüş əsnasında qonaqlar institutun çinşünas kadrların yetişdirilməsi, innovativ tədris proqramlarının tətbiqi və tematik layihələrin icrası sahəsindəki təcrübəsi ilə yaxından tanış olublar.

Yang Jin çıxışında ADU-nun Konfutsi İnstitutunun iki ölkə arasındakı humanitar tərəfdaşlığa verdiyi töhfəni xüsusi vurğulayaraq, mərkəzin təkcə dil öyrətməklə kifayətlənmədiyini, həm də Azərbaycanla Çin arasında möhkəm elmi-akademik körpü rolunu oynadığını bildirib.