Tibb Universitetində 24 saat işləyən kitabxana fəaliyyətə başlayır

Azərbaycan Tibb Universitetinin kitabxana fondunun zənginləşdirilməsi, tələbə və müəllimlərin informasiya resurslarına çıxış imkanlarının genişləndirilməsi, Elektron Kitabxanada xidmət səviyyəsinin yüksəldilməsi istiqamətində işlər davam etdirilir.

Direktor.az xəbər verir ki, bu barədə Tibb Universitetindən bildirilib.

Elektron Kitabxananın direktoru, tarix üzrə fəlsəfə doktoru Ziyafət Eminovanın sözlərinə görə, kitabxananın əsas fəaliyyət istiqamətlərindən biri informasiya ehtiyatlarının yaradılması, həm ənənəvi, həm də elektron kataloq-kartoteka sistemlərinin tətbiqi və bu resursların oxucuların istifadəsinə verilməsidir.

Kitabxanada yaradılan yeni Kitabxana İdarəetmə Sistemi (library.amu.az) müasir beynəlxalq kitabxana standartlarına uyğun hazırlanıb. Sistem tələbə və müəllim heyətinin kitabxana resurslarından daha rahat və operativ istifadə etməsinə imkan yaradacaq.

Yeni sistemin tətbiqi ilə daha geniş tələbə kontingentinin kitabxana fondundan səmərəli istifadəsi mümkün olacaq. Hazırda sistemin yaxın vaxtlarda istifadəyə verilməsi ilə bağlı hazırlıq işləri yekunlaşmaq üzrədir.

ATU-da tələbələrin zəruri ədəbiyyatla təmin olunması da diqqət mərkəzində saxlanılır. Son iki il ərzində tələbələrin daha çox ehtiyac duyduğu dərsliklərin universitetin öz vəsaiti hesabına yenidən çap olunaraq kitabxanaya təqdim edilməsi fondun əhəmiyyətli dərəcədə zənginləşməsinə səbəb olub.

Bundan əlavə, bu günlərdə ATU kitabxanasına Dövlət İmtahan Mərkəzi tərəfindən nəşr olunan “Human Anatomy” (İnsan anatomiyası) adlı ingilisdilli dərs vəsaitinin 150 nüsxəsi daxil olub. Vəsait ATU-nun İnsan anatomiyası və tibbi terminologiya kafedrasının professorları Vaqif Şadlinski, Şahin Qasımov və Balakişi Hüseynov tərəfindən hazırlanıb və redaktə olunub. “Human Anatomy” kitabından tibb təhsili müəssisələrinin tələbələri, insan anatomiyasını tədris edən müəllimlər və digər maraqlı şəxslər yararlana bilərlər.

ATU kitabxanasının oxuculara təqdim etdiyi imkanlar yalnız çap resursları ilə məhdudlaşmır. Mövcud beynəlxalq elektron nəşrlər və məlumat bazaları da oxucuların istifadəsinə verilir. Tələbə və müəllimlər EBSCOhost beynəlxalq elektron resurs platforması ilə yanaşı, digər xarici elektron məlumat bazalarından da istifadə edə bilirlər. Bu xidmətə universitetin 5 tədris korpusunda və 4 klinikasında çıxış imkanı yaradılıb.

Kitabxana 24 saat açıq olacaq Z.Eminova bildirib ki, oxucuların çoxsaylı müraciətləri nəzərə alınaraq kitabxananın 24 saatlıq iş rejimində fəaliyyət göstərməsi də davam etdiriləcək: “Cari tədris ilində oktyabrın 1-dən etibarən kitabxana bayram və bazar günləri istisna olmaqla, 24 saat işləyəcək. Universitet rəhbərliyinin yaratdığı bu şərait tələbələrin, xüsusilə də dərs və imtahanlara hazırlaşanların kitabxana resurslarından daha rahat istifadə etməsinə imkan verəcək.