Ünsiyyət nədir: məlumat vermək, birlikdə iş görmək və bir-birini anlamaq

Direktorlar, direktor müavinləri və rəhbər vəzifəsinə hazırlaşanlar üçün metodiki tövsiyə

«Məktəb rəhbərlərinin ünsiyyət bacarıqları» kitabından

Elşən Qafarov. Məktəbşünas

Bazar ertəsi, birinci dərsə on beş dəqiqə qalıb. Direktor müəllimlər otağına girir və VII siniflərin dərs cədvəlinin dəyişdiyini bildirir. Sonra tədris işləri üzrə müavin və riyaziyyat metodbirləşməsinin rəhbəri ilə birlikdə xəstələnən müəllimin dərslərini kimin əvəz edəcəyini götür-qoy edir. İki namizəd var, onların dərs yükünə baxıb birini seçirlər. Otaqdan çıxanda direktor küncdə susub oturan gənc müəllimin pərt göründüyünü görür. Yanına gedib sakitcə deyir: «Böyük tənəffüsdə bir çay içək, kabinetə gəlin». Beş dəqiqədə üç söhbət oldu. Üçü də ünsiyyətdir, amma hər birinin məqsədi və qaydası ayrıdır. Bu fərqi görən rəhbər hər söhbəti yerinə görə qurur, görməyən isə hamı ilə eyni tonda danışır.