ADA Universitetin müəllimləri Lənkəranda ödənişsiz təlim keçəcəklər

Lənkəranda gənc qızlar üçün rəqəmsal bacarıqlar proqramına start verilib

Lənkəran Dövlət Peşə Təhsil Mərkəzində 18–25 yaş aralığında olan qızlar üçün nəzərdə tutulan “Yango Rəqəmsal Bacarıqlar və İmkanlar Proqramı”nın rəsmi təqdimatı reallaşıb. Təşəbbüs region gənclərinin rəqəmsal sahədə zəruri bilik və bacarıqlara yiyələnməsinə, onların gələcək karyera perspektivlərinin artırılmasına və müasir əmək bazarının rəqabət mühitinə daha rahat inteqrasiya etməsinə yönəlib.

Layihə çərçivəsində təşkil olunan ödənişsiz təlimlər ADA Universitetinin professor-müəllim heyəti tərəfindən aparılacaq və tədris prosesi 2027-ci ilin mart ayınadək davam edəcək.

Müasir dövrdə peşə təhsili ocaqları ənənəvi sənət tədris edən müəssisə çərçivəsini aşaraq, gənclərin innovativ biliklər əldə etdiyi, fərdi potensialını reallaşdırdığı və gələcək inkişafını formalaşdırdığı strateji platforma rolunu oynayır. Qızların hərtərəfli inkişafına göstərilən bu cür dəstək isə bütövlükdə cəmiyyətin dayanıqlı və güclü gələcəyinə yönəlmiş ən mühüm sərmayə kimi qiymətləndirilir.