AZAL əməkdaşları BMU-da seminar keçib

Bakı Mühəndislik Universitetində (BMU) Azərbaycan Beynəlxalq Hava Yolları (AZAL) şirkəti əməkdaşlarının iştirakı ilə mühəndislik ixtisaslarının tələbələri üçün interaktiv seminar keçirilib.

Direktor.az xəbər verir ki, bu barədə universitetdən bildirilib.BMT-nin Dayanıqlı İnkişaf Məqsədlərinin 4-cü (Keyfiyyətli təhsil), 9-cu (Sənaye, innovasiya və infrastruktur) və 17-ci (Məqsədlər naminə tərəfdaşlıq) istiqamətlərinə uyğun olaraq təşkil edilən seminarın əsas məqsədi tələbələri aviasiya sektorundakı müasir texnoloji proseslərlə tanış etmək, eləcə də AZAL-da istehsalat təcrübəsi və gələcək məşğulluq imkanları barədə məlumatlandırmaq olub.

Tədbirdə çıxış edən BMU-nun Mühəndislik fakültəsinin dekanı Asif Quliyev müasir mühəndislik təhsilində nəzəri biliklərin praktiki təcrübə ilə tamamlanmasının, universitetlə sənaye müəssisələri arasında əməkdaşlığın genişləndirilməsinin əhəmiyyətini vurğulayıb. Belə tədbirlərin tələbələrin peşəkar inkişafına, əmək bazarının tələblərini daha yaxından öyrənməsinə və gələcək karyeralarını düzgün istiqamətləndirməsinə töhfə verdiyi qeyd olunub.

Seminarda AZAL-ın İnsan Resursları idarəsinin aparıcı mütəxəssisi Əzizbikə Abdullayeva, elektromexanika üzrə qrup rəhbəri Cahangir Paşayev və “Power Plant” mühəndisi Mirxanım Ağalarova çıxış ediblər. Çıxışlar zamanı təyyarələrin uçuş təhlükəsizliyinin təmin olunması, texniki istismarı, həyat dövrü, əsas sistemləri və aviasiyada yaranan texniki nasazlıqların aradan qaldırılması ilə bağlı məlumat verilib. Həmçinin aviasiya mühəndislərinin fəaliyyət istiqamətləri və bu sahədə texniki biliklərin, dəqiqliyin və peşəkar məsuliyyətin rolu diqqətə çatdırılıb.

İnteraktiv formatda davam edən seminarda tələbələr AZAL-da karyera imkanları, istehsalat təcrübəsi proqramları, proqrama seçim prosesi və işə qəbul şərtləri barədə məlumatlandırılıblar. Xüsusilə sonuncu kurs tələbələri üçün mövcud vakansiyalar, eləcə də aviasiya sahəsində lisenziyalı mühəndis kimi fəaliyyət göstərmək üçün irəli sürülən tələblər diqqətə çatdırılıb. Tələbələrin sualları cavablandırılıb, onları maraqlandıran məsələlər ətrafında müzakirələr aparılıb.

BMU-nun Müəssisələrlə əlaqələr və karyera mərkəzi və Tələbə Elmi Cəmiyyətinin təşkilatçılığı ilə baş tutan tədbir çərçivəsində tələbələrə Bootcamp proqramı, proqrama qoşulma qaydaları və peşəkar bilik, bacarıqların inkişafı üçün nəzərdə tutulan imkanlar barədə də məlumat verilib.