Qazax-Tovuz RTİ-nin tabeliyində olan məktəblərdə adaptasiya təlimləri keçirilir

Qazax-Tovuzda yeni təmayül modelinə hazırlıq məqsədilə adaptasiya görüşləri keçirilir

Qazax-Tovuz Regional Təhsil İdarəsinin tabeliyində fəaliyyət göstərən məktəblərdə yeni tədris ilindən tətbiqinə başlanacaq təmayül tədris modelinə hazırlıq çərçivəsində silsilə adaptasiya tədbirləri reallaşdırılır. Dərs ilinin başlamasına sayılı günlər qalmış təşkil olunan görüşlərə şagirdlərlə yanaşı, onların valideynləri də cəlb edilir.

Təşkil olunan tanışlıq tədbirlərində iştirakçılar məktəb mühiti, pedaqoji kollektiv və yenilənmiş tədris planı ilə yaxından məlumatlandırılır. Görüşlərin əsas qayəsi şagirdlərin yeni akademik mühitə rəvan uyğunlaşmasını təmin etmək, valideynlərdə isə tətbiq olunacaq tədris mexanizmi barədə aydın təsəvvür formalaşdırmaqdır.

2026–2027-ci tədris ilində region üzrə ümumilikdə 5 təhsil ocağında sözügedən modelin icrası nəzərdə tutulur və layihə çərçivəsində 845 şagirdin təmayüllü təhsilə cəlb edilməsi planlaşdırılır.

Yeni tədris modelinin başlıca hədəfi yuxarı sinif şagirdlərinin ali məktəblərə hazırlığını bilavasitə məktəb daxilində daha effektiv şəkildə təşkil etmək, onların fənlər üzrə dərin bilik və bacarıqlara yiyələnməsinə şərait yaratmaqdır. Bu yanaşma təhsilalanların fərdi istedad və məqsədlərini nəzərə almaqla daha intensiv, gücləndirilmiş və nəticəyönümlü tədris mühitinin qurulmasını təmin edəcək.