Tibb Universitetində həkim-rezidentlərin imtahanı keçiriləcək

Azərbaycan Tibb Universitetinin Rezidentura və Magistratura Departamenti həkim-rezidentlərin bilik və bacarıqlarının yoxlanılması məqsədilə növbəti dövri attestasiya prosesinə start verir.

Direktor.az xəbər verir ki, imtahanlar 08–09 oktyabr 2026-cı il tarixlərində universitetin İmtahan Mərkəzində təşkil ediləcək. Qiymətləndirmə prosesi test üsulu ilə aparılacaq. İmtahan iştirakçılarına 50 test tapşırığı təqdim olunacaq və bu sualları cavablandırmaq üçün cəmi 2 saat vaxt ayrılacaq. Hər bir düzgün cavab 2 balla dəyərləndirilir. Səhv seçilmiş variantlar və ya cavabsız saxlanılan suallar üzrə bal hesablanmır (0 bal verilir). Attestasiyadan uğurla keçmək üçün ən azı 60 bal toplamaq tələb olunur.

İmtahan binasına daxil olarkən rezidentlərin üzərində mütləq şəxsiyyət vəsiqəsi olmalıdır; sənədi olmayan şəxslər zala buraxılmayacaq. Bundan əlavə, namizədlər öncədən İmtahan Mərkəzinə yaxınlaşaraq imtahan şifrələrini əldə etməlidirlər. Üzrlü səbəb olmadan imtahanda iştirakdan yayınan həkim-rezidentlərin növbəti il keçiriləcək attestasiyaya qatılmasına icazə verilməyəcək.